Аймгийн Иргэдийн Төлөөлөгчдийн Хурлын дэргэдэх Хөдөө Аж Ахуй, Байгаль орчин, Аялал жуулчлал хариуцсан ахмад зөвлөхүүд төлөвлөгөөний дагуу “Зая гэгээний мөрөөр” аялалыг 5 сарын 27-ны билэгт сайн өдөр зохион байгууллаа. Аялалд Эрдэнэбулган сумын 100-аад ахмад хамрагдсан байна. Ахмадууд Зая гэгээний Хүслийн хад, Майдар бурхан, Хоёр модны рашаан гэсэн маршрутаар аялав.

Аялалд оролцсон буурай нар маань 8 – 10 хүний бүрэлдэхүүнтэй гал болон хуваагдаж, хоол унд, спорт, урлагын тэмцээн уралдаанд галаараа идэвхтэй оролцож байсныг хараад бид өөрийн эрхгүй ахмадуудаараа бахархаж байлаа.

Аялалаар ахмадууд маань Хүслийн хад, Майдар, Хоёр модны рашааны ойр орчимын хогийг цэвэрлэж, байгаль орчноо хамгааллаа. Энэхүү аялалд хамрагдсан ахмадууд маань сэтгэл өндөртэй байсан төдийгүй, 10 насаар залуужих шиг боллоо гэж хөөрөлдөж байв. Удаан уулзалтаагүй ахмадууд маань хоорондоо хол ойрын хууч хөөрөлдөж, үр хүүхдүүдийнхээ амь, амьдралыг даатгах болон санаа зовнисон зүйлсээ засаж залруулж өгөхийг аминчлан залбирч, Хүслийн хадандаа чинь сэтгэлээсээ сүсэглэн мөргөх буурай нараа хараад бидний зохион байгуулсан аялал үр дүнтэй буянтай сайхан ажил болжээ хэмээн бодогдож явлаа.