Монгол Улсын Ерөнхийлөгч Х.Баттулга өчигдөр Баян-Өлгий аймгийн иргэдтэй Өлгий хотын Хурманханы нэрэмжит хөгжимт драмын театрт уулзлаа.
Төрийн тэргүүнийг аймгийн удирдлагууд угтаж, цэргийн хүрээ жагссан юм. Дараа нь Монгол Улсын Ерөнхийлөгч Х.Баттулга аймгийн удирдлагуудтай уулзаж, аймаг орон нутагт тулгамдаж байгаа асуудлаар санал солилцож ярилцав.
Аймгийн Засаг даргын зүгээс Ерөнхийлөгчид хандан аймагт тулгамдаж буй 10 хэдэн асуудлыг танилцуулж, гол хоёр асуудлыг шийдвэрлэж өгөхийг хүссэн юм.
Тухайлбал: Монгол улсын иргэний харьяаллаа сэргээн тогтоолгох тухай хүсэлт гаргасан 64 өрхийн 104 казах иргэний асуудлыг мөн Монгол Казахстан улсын хоорондын нислэгийг дахин сэргээх зэрэг асуудлуудыг шийдвэрлэж өгөхийг Төрийн тэргүүнд уламжиллаа.
Аймгийн иргэд маань ч орон нутагт ажлын байр хомс байгаа, залуучуудынхаа хөдөлмөр эрхлэлтийг төрөөс бодлогоор дэмжих, цалин, тэтгэврийг нэмэх, хүүхдийн мөнгийг алагчлалгүй олгох зэрэг нийтлэг асуудлуудыг хөндөж байлаа.
Уулзалтын төгсгөлд Монгол Улсын Ерөнхийлөгч Х.Баттулга иргэдийн асуултад хариулж, УИХ-д оруулахаар бэлтгэж байгаа хуулийн төслийн үзэл баримтлал болоод Монгол Улсын Ерөнхийлөгчийн Тамгын газраас хэрэгжүүлж байгаа төсөл, хөтөлбөрийн талаар мэдээлэл өгөв.
